ລົງຈັດຕັ້ງນໍາພາຊາວກະສິກອນຜັນຂະຫຍາຍວິທີການຜະລິດ ແລະ ນຳໃຊ້ຝຸ່ນອົງຄະທາດເຂົ້າໃນການຜະລິດກະສິກຳຕາມຫຼັກ CSA

ໃນລະຫວ່າງ ວັນທີ 08 ຫາ 23 ມີຖຸນາ 2024 ທີມງານວິຊາການຈາກສູນພັດທະນາທີ່ດິນ ແລະ ຄຸ້ມຄອງການນຳໃຊ້ຝຸ່ນ, ກົມຄຸ້ມຄອງ ແລະ ພັດທະນາທີ່ດິນກະສິກຳ ຮ່ວມກັບ ຫ້ອງການປະສານງານໂຄງການຂັ້ນສູນກາງປະຈຳກົມສົ່ງເສີມກະສິກຳ, ພະແນກກະຊິກຳ ແລະ ປ່າໄມ້ ແຂວງ ເຊກອງ ໄດ້ລົງຈັດຕັ້ງນໍາພາຊາວກະສິກອນຜັນຂະຫຍາຍວິທີການຜະລິດ ແລະ ນຳໃຊ້ຝຸ່ນອົງຄະທາດເຂົ້າໃນການຜະລິດກະສິກຳຕາມຫຼັກ CSA ໃຫ້ແກ່ກຸ່ມບ້ານເປົ້າໝາຍ 10 ບ້ານ 2 ເມືອງ ກໍ່ຄື: ບ້ານ ຫຼັກຂາວ, ບ້ານ ໂກງຕາຢູນ, ບ້ານ ທ່າແຕງໃຕ້, ບ້ານ ທ່າແຕງເໜືອ, ຫົວເຊໂດນ, ຫ້ວຍຊາຍ ເມືອງ ທ່າແຕງ ແລະ ບ້ານ ງອນດອນ, ບ້ານ ໂນນສະຫວັນ, ບ້ານ ດາກບອງ ແລະ ບ້ານ ດາກຈືງ ເມືອງ ດາກຈືງ, ຊຶ່ງມີຜູ້ເຂົ້າຮ່ວມຝຶກອົບຮົມໃນຄັ້ງນີ້ 124 ຄົນ; ຍິງ 89 ຄົນ, ຊຶ່ງສະແດງອອກໃນວຽກງານສົ່ງເສີມບົດບາດຍິງ-ຊາຍກວມເອົາປະມານ 71.7 %. ຈາກຜົນງານດັ່ງທີ່ໄດ້ກ່າວມານັ້ນແມ່ນໄດ້ຮັບການສະໜັບສະໜູນທຶນຈາກທະນາຄານພັດທະນາອາຊີ ຜ່ານໂຄງການສົ່ງເສີມລະບົບຕ່ອງໂສ້ການຜະລິດກະສິກຳເປັນສິນຄ້າທີ່ເປັນມິດຕໍ່ສີ່ງແວດລ້ອມ, ທ່ານ ນາມມະກອນ ສຸກຈະເລີນ, ຮອງຫົວໜ້າສູນພັດທະນາທີ່ດິນ ແລະ ຄຸ້ມຄອງການນຳໃນຝຸ່ນ ໄດ້ກ່າວນຳສະເຫນີແນວທາງການຈັດການດິນ ແລະ ການປັບປຸງບຳລຸງດິນ ຍົກສະມັດຕະພາບການຜະລິດ,ຜົນຜະລິດສູງຂຶ້ນ ແລະ ການນຳໃຊ້ດິນໃຫ້ມີຄວາມຍືນຍົງ ໃຫ້ແກ່ຊາວກະສິກອນໃຫ້ເຂົ້າໃຈ ກ່ອນ ນຳພາປະຕິບັດຕົວຈິງໃນແຕ່ລະກຸ່ມບ້ານ ໃນການຈັດຕັ້ງປະຕິບັດໃນຄັ້ງນີ້ມີຈຸດປະສົງແມ່ນເພື່ອສ້າງຄວາມເຂັ້ມແຂງໃຫ້ແກ່ກຸ່ມຊາວກະສິກອນປູກພືດຜັກກະສິກຳສະອາດ,ກະສິກຳອິນຊີ ແລະ ເປັນສິນຄ້າຮູ້ຈັກນຳເອົາສີ່ງເສດເຫຼືອມາໝູນໃຊ້ໃຫ້ເກີດປະໂຫຍດເຊັ່ນ ເຕັກນິກການນຳໃຊ້ສີ່ງເສດເຫຼືອມາເຮັດຝຸ່ນອົງຄະທາດ, ຝຸ່ນບົ່ມ ແລະ ຜະລິດນໍ້າໝັກຊີວະພາບ, ນໍ້າສະກັດຊີວະພາບ ເພື່ອປະຢັດຕົ້ນທຶນ, ເພີ່ມສະມັດຕະພາບ ແລະ ສ້າງລາຍຮັບໃຫ້ແກ່ຊາວກະສິກອນທີ່ປູກພືດເປັນສິນຄ້າ ສາມາດເປັນຕົວແບບໃນການປະຕິບັດກິດຈະກຳ ເຊີ່ງໃນການຝຶກຄັ້ງນີ້ປະກອບມີຫົວຂໍ້ຄື 1. ຄວາມຮູ້ພື້ນຖານກ່ຽວກັບດິນ, 2.ປັນຫາດິນຕໍ່ການປູກພືດ, 3.ຄວາມຮູ້ພື້ນຖານກ່ຽວກັບຝຸ່ນ, 4.ວິທີການຜະລິດນໍ້າໝັກຊີວະພາບ,ນໍ້າສະກັດຊີວະພາບ ແລະ ການຜະລິດຝຸ່ນອົງຄະທາດ,ຝຸ່ນໝັກ ແລະ ຝຸ່ນບົ່ມ ອີກດ້ວຍ.